हमहू पढ़बै (बाल कविता)

😊हमहू पढ़बै (बाल कविता)

हमहू पढ़बै

जानू ने

पाटी कीनि के

आनू ने

पैसा नै अइछ

कानू नै

हमहुँ पढ़बै

जानू ने।

सब बच्चा 

गेलै स्कूल

ई सभ ते

पुरना छै "रूल"।

हमहुँ पढ़बै

आगू बढ़बै

बाबू आब नै

करबै भूल।

गरमीक

मौसम छै बाबू

छाता कीनि के

आनू ने

हमहुँ पढ़बै

जानू ने।

खेल खेल में

पढ़बै बाबू

छुट्टी में हम

खेलवै बाबू

अहाँक कोरा

कान्हा चढ़ि के

मेला देख'

चलबै बाबू।

रंग -बिरंगक

फुकना किनबै

हमर बात 

अकानू ने

हमहुँ पढ़बै

जानू ने।

✍✍

स्वाती शाकम्भरी

 (Swati Shakambhari )

सहरसा

श्रधेय राजकमल के प्रति काव्यांजलि

||  श्रधेय राजकमल के प्रति काव्यांजलि || 

धरती सँ
मुक्त आकाश धरि
अहाँक साहित्यिक उच्चता
समुद्र सन 
तकर गंभीरता
जीवन सन सत्यता
मृत्यु सन यथार्थता
अहाँक साहित्यिक
इएह मूलभूत
उत्स थीक
अहाँक शब्द में
विशाल भावक
परिकल्पना
इएह तें
दर्शन थीक।
छान्हि नै
बान्हि नै
प्रवहमान भाव अछि
छाँटल नै
काढल नै
परम्पराक साँच पर
गढल नै
थाहि थाहि
चढल नै।
जिनक सहजहिं
स्वभाव अछि
दल दल मे
जे नै धँसल
सएह भेलखिन
राजकमल।
✍✍ 
स्वाती शाकम्भरी
(Swati Shakambhari)
सहरसा।