अनुचित केहन करै छी यौ

 ( भास - नचारी  )

अनुचित  केहन  करै  छी  यौ    ।

सोन सनक बेटा  जनमा  कउ

मूल्य   धरै   छी   यौ ----

अनुचित केहन -- सोन सनक - मूल्य ---

रावण एक  कनोलक  सीता

तकर दण्ड  वो  पौलक  ।

तिलक - वाण सँ  लाखो  बेटीक

प्राण    हरै    छी    यौ  ----

अनुचित केहन -- सोन सनक - मूल्य ---

लाख करोड़  टाका  गनबौलहुँ

जेवर   लेलौं     धराय   ।

मोटर साइकिल  चरपहिया लय  -

नित   झगड़ै    छी   यौ-----

अनुचित केहन -- सोन सनक - मूल्य ---

बेटीक  जन्म  हमर  मिथिला  में

भेल   अछि   अभिशाप  ।

निर्धन कन्यागत  केर जीवन -

ज्योति   हरै   छी   यौ  ॥

अनुचित केहन -- सोन सनक - मूल्य ---

"रमण"  सब सँ  हाथ  जोरि कय

कहलक    आई    पुकारि

अप्पन माहुर अपनहि खा कय

सब   मरै   छी   यौ ----

अनुचित केहन -- सोन सनक - मूल्य ---

रचैता -

 रेवती रमण झा " रमण" 

 मो -9997313751 

    समस्त पाठक गन सन  आग्रह  एक बेर ई विडियो लिंक जरूर देखि  ----

जय मैथिल - जय ----

मिथिलाक गीत

मिथिलाक गीत

पग - पग  पर  हो  मिथिलाक गीत  ।
रमण    मनोरथ     प्रवल    पुनीत ॥
मनक    बात      ब्रहाणी     जानू    ।
आँगक  गति  - बिधि  शुभे बखानू  ॥
दर  - दर   ठोकर   खूबे   खयलहूँ    ।
रहलहुँ  रगड़ति  , बयस  बितयलहुँ ॥
नीके    लागल ,  कलम   धेने   छी   ।
यतन  गढ़ी - गढ़ी  कवित  केने  छी  ॥
मति - गति  नियति , लेल सब हेरि  ।
  दल -  दल   जीवन ,  देल   अवडेरि   ॥
नगर   -  डगर   नपिते    दिन  गेल  ।
हामहि  सब  किछु , किछु नञि भेल  ॥
कुमतिक   काल  - चक्र    बौरायल   ।
 रहितहूँ  सजग , सुदिन नञि आयल ॥
जीवन  जीलहुँ  , भेल नञि  सुकारथ ।
बैह   कार्य ,   जे  अछि    परमारथ    ॥
______________

रचैता  - रेवती रमण  झा "रमण "