अप्पन हारल ककरा कहबई

कोमल मोन तन्नुक भाव ,
शब्द कठोर , गंभीर घाव |
दोसर सदिखन हंसी ऊडेतई,
मोनक बात जकरा कहबई |
अप्पन हारल ककरा कहबई-

बाज'य कथा सब अपने अपना ,
टूटय बरु आनक सुन्नर सपना  |

फाटल दोसर टांग अड़ाबई ,
एकरे त' सब रगडा कहबई |

अप्पन हारल ककरा कहबई -

भाऊ हिसाबे ,सिनेह देखाबई ,
गिरला उत्तर आँखि चोराबई  |

गेठी दाम नहि महल मोलाबई ,
एकरे दादीक फकरा कहबई  |

अप्पन हारल ककरा कहबई-

कियो पैघ नहि कियो छोट ,
थोड बहुत त' सब में खोट  |
बनि अप्पन जे सुनतइ बात ,
मोनक मीत तकरा कहबई  |

अप्पन हारल ओकरा कहबई  -- 

सादर : महेश झा 'डखरामी '

दसा

'दसा

उज्जर केश उज्जर पनही,
उज्जर वेश उज्जर कंगही |
बयस पचपन मोन जुआन ,
राखी अप्पन दसाक ध्यान ।

ऊठी कत्तय बैसी कत्तय,
बाजी कक्खन मुस्की कत्तय|
एक्कर सदिखन रहय ज्ञान ,
राखी अप्पन दसाक ध्यान ।

उमर उत्तर भेला पचास ,
जीभ 'जोरक' नै दास खबास |
बांचत तक्खने प्रौढक मान,
राखी अप्पन दसाक ध्यान ।

पहिरी केहेन कपड़ा लत्ता ,
आबो छोडू अहंगक सत्ता  |
सम्भव तक्खने सुभग सम्मान,
राखी अप्पन दसाक ध्यान ।

देखू , भोरे द'र दलान ,
सम्भव सेवा सालिगराम |
भजन कीर्तन सीताराम ,
राखी अप्पन दसाक ध्यान ।

सादर : महेश झा 'डखरामी'

अंतर्भाव

अंतर्भाव

प्रीति परात ह्रदय धवल ,
अंतर आबद्ध भ्रमर कमल |

कँवल कोमल प्रेम पाश ,
कुंजी कन्चुक कंत आश |

पसरल भुवन भाष्कर भाव ,
भ्रमर भ्रमित आसक्ति प्रभाव |

सुन्दर सोच , सुंदर काज ,
शब्द सुन्दर , सुंदर लाज |

अगम अथाह कमल विमल ,
मदान्ध गन्ध मत्त प्रवल |

कोमल गुन्जन शिथिल गात ,
सिनेह निमंत्रण प्रणय प्रपात |

नयन नेह मन ह्रदय हंसल ,
दर्शन प्रीतम नित्य नवल |

सादर: महेश झा 'डखरामी'