||मिथिला वासी सब मैथिल छथि ||
विद्यापति केर गीत कोयलिया
गाबि रहल अछि भोरे सं ।
मिथिलावासी सब मैथिल छथि
सुनू कहैत अछि जोरे सं ।।
मिथिला वासी....
कुलदेवी चिनुआरे बैसलि
कुल पर ध्यान धेने छथि ।
अचरी मौर माथ पर राजित
गुड़हल फूल लेने छथि ।।
जय-जय भैरवि असुर भयावनि
सुनिते अयलहुँ ओरे सं ।।
मिथिला वासी....
वर सोहर समदाउन नचारी
बटगवनी अछि जन - जन में ।
उगना दास दिगम्बर भोला
छथि मिथिला के कण-कण में ।।
विद्यापति विरहिनिक व्यथा के
सबटा लिखलनि नोरे सं ।।
मिथिला वासी...
अस्सी वरषक बूढ़ दलान पर
जखन गबै छथि विरहा ।
पियू कहाँ कहिरहल कात में
आमक गाछ पपिहरा ।।
घड़िघन्टा चानन चनरौटा
गीता सबहक ठोरे सं ।
"रमण" देल परिचय मिथिला केर
अपन शब्द में थोरे सं ।।
मिथिला वासी...
गीतकार
रेवती रमण झा " रमण "
कोई टिप्पणी नहीं:
एक टिप्पणी भेजें