|| आब लगैया डर गै ||
बहिना घुसि गेल बाढ़ि विकट सन सबहक घर गै ।
देखि लगैया डर गै ना ।। ....
केकरो भीत घरक खसि गेल
कतेको माल जाल फंँसि गेल
बच्चा बुढ़िया मरि गेल
दबि कय कोठीतर गै ।। आब....
जीवन लागि रहल अनहार
भयंकर जलक अछि फुफकार
कतेको बैसल गाछ , आ
जाकय कोठा पर गै ।। आब....
डुबि गेल सबहक घर घरारी
दहि गेल कोठी आर बखारी
कोना क बाँचत प्राण ई
बैसल छी एसगर गै ।। आब...
सबहक मोन अछि बौरायल
प्राणक प्रलय पंथ अछि आयल
धक धक करै करेजा
देखहिन आई हमर गे ।। आब...
जकर छलै गाम में शान
टुटलै ओकरौ आई गुमान
"रमण" जे छल धुरंधर
बैसल छै एसगर गै ।। आब....
गीतकार
रेवती रमण झा "रमण"
कोई टिप्पणी नहीं:
एक टिप्पणी भेजें