|| चल गे बहिना तोरे कहबौ || गीतकार - रेवती रमण झा "रमण"

              || चल  गे  बहिना  तोरे  कहबौ ||
                                  

                    केकरा   कहबै   के   पतिएतै
                    हमर दिल के बात ।
                    चल  गे  बहिना  तोरे  कहबौ
                    नहाइलय नदी कात ।।

                    धरय लगला हाथ कि चटदय
                    आँचर तर नुकयलौ ।
                    तखन उठ्यलनि कोर छिहुलि हम
                    कोठी तर परयलौ ।।

                     एतबहि में भरि कोर उठौलनि
                     सुनलनि एकौ नै बात ।
                     चल गै बहिना तोरे.............

                     कामातुर  आवेश  में  परि कय
                     सगरो गात के तोरि देलैन ।
                     नवल  उरोज  सरोज  कली दू
                     निर्दय जेकाँ मड़ोरि देलैन ।।

                     धक् धक् करय करेजा तेहिखन
                     थर - थर काँपय गात ।
                     चल गै बहिना तोरे...............

                    अधरामृत  मधु   पिवि  ठोर  के
                    सब सुखयलनि लाली गै ।
                    दूनू      हाथक     चूड़ी    फुटल
                    टूटल कानक बाली गै ।।

                    एक  बुन्द  लय   तरसल  धरती
                    पर भेलै बरसात ।
                    चल गै बहिना तोरे..............

                    कतेक निहोरा विनती कयलहुँ
                    पिया एक नै मानल गै ।
                  "रमण" चतुर्थीक राति एहन छल
                    अपने टा जिद ठानल गै ।।

                     रातुक  गेल  निकललौ  घर सं
                     भेलै जखन परात ।
                     चल  गै  बहिना   तोरे  कहबौ
                     नहाइलय नदी कात ।।

                                  गीतकार
                        रेवती रमण झा "रमण"
                       mob - 09997313751